"Kod Saatı” layihəsi böyük uğurla başa çatdı
22-31 may 2024-cü il tarixlərində Coders Azerbaijan, Dövlət Gömrük Komitəsinin Akademiyası (DGKA) və Azərbaycan Dövlət İqtisad Universitetinin (UNEC) birgə təşkilatçılığı ilə həyata keçirilən “Kod Saatı” layihəsi böyük uğurla başa çatdı. Bu layihə proqramlaşdırma sahəsində biliklərini artırmaq istəyən gənclər üçün mükəmməl bir fürsət oldu.
Layihənin əsas məqsədi tələbələrin alqoritmik düşünmə bacarıqlarını inkişaf etdirmək, komanda işini öyrətmək və onları texnologiyanın ən son nailiyyətləri ilə tanış etmək idi.
Layihənin detalları
Tədbir çərçivəsində 22 komanda seçilərək bir həftə ərzində təcrübəli mentorların rəhbərliyi ilə işlədilər. Hər bir komanda fərqli tapşırıqları həll etmək və alqoritmik biliklərini praktiki şəkildə tətbiq etmək üçün öz bacarıqlarını nümayiş etdirdi. Layihənin ən həyəcanlı hissəsi final yarışı idi. Burada komandalar alqoritmik problemləri ən tez və düzgün şəkildə həll etmək üçün bir-biriləri ilə rəqabət apardılar.
- DGKA: "Byte Bandits" komandası
- UNEC: "Frack" komandası
Bu iki komanda layihənin qalibi seçilərək Coders Azerbaijan tərəfindən təqdim olunan 1000 AZN dəyərində tədris kuponu qazandı. Komandaları təbrik edir və gələcək karyeralarında onlara uğurlar arzulayırıq.
